OTOČAC – Pok je snaja došla u našu kuću, krava iz štale van. Ne edna, van sve. To van je tako kad za snaju dobijete Bosansku, ni krave, ni prasice, ni kokoše, ničesa u dvorišću. Raste trava zelena, konda je lumer prokljelo. I to ni samo u našoj kući tako, van svudaj. I unda domaće snaje vidile kakovu modu tiradu Bosanke pa i une tako utetivile, krava jin smrdi, to fuj.
I tako mi već ima godin i godin nemamo ni vratarnje krave, mliko kupujemo kaj najveća gospoda. Sela baba Jule i nabraja koliko smo negda imali krav i kako jin bilo ime: - Ljuba, Siva, Cvita, Ruma ... Risa, e, e, i Risa, pa Crlja, pa Mrka, Meda, da, da i Meda, esan li još ko ime preskočila, a? – pita baba. – Esi, kako nisi – velimo joj mi ki znamo da je krav bilo, snaja sidi, prebacila nogu preko noge i okriće očima kaj mješalica. – Ma ko san preskočila? – Milova! – Milova?! ... Ma ka Milova? ... Ča ti brndaš, nigda nismo imali kravu takovoga imena, to su imali ti tamo gori. – Da nismo? – Borami nismo, ni Milova, ni Perava – ne da se baba Jule.
-A vidi ministera Butkovića un ima Milovu. Aha, ča sadaj veliš baba, a? – More un imat i grbadevu ča se mene tiče. I samo da ti nešto rečen, koliko se ja u marvu razumin, a razumin se, nisan ja kaj va tvoja s noktima od pedlja, to ni Milova van Milovan. – E kakov te sadaj Milovan spopal? – Takov. Ako ste vi svi u voj Rvackoj munjeni, i ako van je Butković podvalil Milovana pod Milovu, unda to ni moj problem, van vaš. – Kakova podvala? Ki podvalil? – Pa Butković je podvalil precedniku Milanoviću da je Milvovan Milova. I oko toga cela država danima bunberala prije izborov. Dobro se i Izborno poverenstvo ni uprcalo vidit ča je marva, el Milova il Milovan.– Ubi me, ako te iča razumin. – Vidin ja da ti niš ne razumiš, dupe-glava.
-Vidi vako, da tebi tvoja baba rastumači, kad je na tomu televizoru pokazalo Butkovića i Milovu, ja san man vidila da je tote na delu Istanbulka, teško je danaske pogodit ča je muško a ča žensko. – Pazi baba ča divaniš, ni se u to pačat, mogla bi ti na nu stranu brave. – Neka bude, stara san, moredu s manon kud ojdu. – Kako more bit muško kad je Milova krava, baba, krava je. – Je, kaj ja cura – i pokažuje nan, da prostite, šipak. ... Ja san man po glavi vidila da je to junčić, jaka glava, debeli i kratki rožići, jaki pupak, debele noge u čičici. To ne more bit krava pa da vratar reče. Ni tila Milova nogu pomaknut pa da vidimo ima li kesu, al vami se more pokazat ča oće kase uto ne razumite. – Ma daj! – I sadaj lipo kasu izbori prošli, odakrlo se da ni Milova Milova, van da je Milovan. Butković je celoj naciji prodal muda pod bubrige. I precedniku. – Vidiš ti, vidiš, morda ti baba imaš i pravo ... nešto u zadnje vrime se raspisali da Milova ima penis ... – Koga vratra da ima, a? – Ma niš, niš, ja to nako. – Vidin ja da vi svi nako. Da je ki rekal da je muzal jarca u rešeto, vi bi u izborima i to poverovali, borami bi.
Reče nami baba Jule, pa komu milo, a komu krivo.
I.B.